O exfuncionario do Concello de Vigo Francisco Javier G. O., condenado a máis de 5 anos de cárcere por ‘enchufar’ a unha cuñada da presidenta da Deputación de Pontevedra, Carmela Silva nunha contrata municipal, presentou recurso de súplica contra o auto que lle dá un prazo de 5 días para ingresar voluntariamente en prisión.

No escrito presentado pola súa defensa, explica que a Audiencia Provincial deu por desestimada a súa solicitude de indulto (ao transcorrer máis dun ano desde que a presentou ante o Ministerio de Xustiza) e considera que, aínda que non hai resposta para aceptar a medida de gracia, tampouco hai resolución expresa para desestimala.

Neste sentido, o seu avogado lembra que, cando o Tribunal Provincial accedeu a suspender a entrada en prisión mentres se tramitase o indulto, fíxoo sen ningunha matización de prazo (aínda que Fiscalía e acusación popular si pediron que esa suspensión non fose por un tempo superior a un ano).

Por tanto, a defensa de Francisco Javier G.O. entende que esa solicitude de indulto “segue en trámite” e que, se o exfuncionario entra no cárcere e logo se lle perdoa a condena, vulneraríanse os seus dereitos. Así as cousas, suplica á Audiencia que estime o recurso e manteña suspendida a execución da pena mentres se tramita o indulto.