Alumnos da Universidade de Vigo e da Escola Naval Militar de Marín competirán o próximo 20 de abril no I Regata Almirante Álvarez-Ossorio-Trofeo Ría de Pontevedra, que desenvolverá na modalidade de ‘barco dragón’ e na que participarán dúas tripulacións por cada unha das institucións (unha masculina e unha feminina).

A proba sairá ás 16,30 horas do Gremio de Mareantes e é a primeira regata na que competirán estudantes da UVigo e da Escola Naval, aínda que “nace con vocación continuidade, segundo sinalaron fontes da institución militar.

Esta actividade enmárcase nas iniciativas que porá en marcha o vicerreitorado do Campus de Pontevedra en próximas semanas, con motivo da Semana da Creatividade e da Innovación, da Cátedra Almirante Álvarez-Ossorio, e está organizada coa colaboración do Club de Piragüismo de Pontevedra.

A regata desenvolverase na modalidade de ‘barco dragón’, unha disciplina deportiva orixinaria de China e que empezou a popularizarse en Euroa na década de 1990. Son embarcacións con 12 tripulantes (dez remeiros e remeiras, un temoneiro e un tripulante que leva o ritmo). Neste primeiro trofeo, o percorrido será de dous quilómetros e dous ciabogas, en augas interiores da ría de Pontevedra.

O director de área adxunta ao Vicerreitorado, Luís Torres, destacou que esta iniciativa permite “abrir o campus ao río”, tendo en conta a proximidade do campus ao Lérez, e subliñou que un dos obxectivos da Universidade é promover proximamente novas actividades nesta contorna.