As traballadoras das tendas de H&M de Vigo e Pontevedra acordaron desconvocar un dos dous días de folga que anunciaran para esixir o cumprimento do convenio colectivo, tras confirmar a empresa que atenderá esa demanda e que actualizará salarios e pluses.

Así, o paro quedará reducido á xornada do 8 de abril, á espera de que se apliquen eses incrementos de soldo comprometidos e se aumenten as xornadas a 40 horas semanais.

Segundo explicou CIG-Servizos a través dun comunicado, a compañía aceptou tamén abonar os 200 euros da bolsa de vacacións por gozalas fóra do verán. Con todo, queda pendente o aumento de xornadas a 40 horas, o que supón ter un 75 % de contratos a tempo completo, e por iso mantívose a folga do día 8 de abril.