Vigo acollerá en xuño o VIII Xornadas Nacionais de Investigación en Ciberseguridade (JNIC), que levarán a cabo entre os días 21 e 23 dese mes e están organizadas polo centro tecnolóxico Gradiant e o Centro de Investigación en Tecnoloxías de Telecomunicación da Universidade de Vigo, atlanTTic.

Tal como informaron os seus organizadores, este encontro trátase da principal referencia en xeración de coñecemento e innovación de ciberseguridade a nivel estatal, polo que conta co apoio do Instituto Nacional de Ciberseguridade.

É a primeira vez que estas xornadas se desenvolven en Galicia desde a súa posta en marcha en 2015, tras o seu paso por León, Granada, Madrid, San Sebastián, Cáceres e Bilbao. Os participantes poden inscribirse a partir do 10 de abril.

“JNIC é un congreso científico para o intercambio de coñecemento e experiencias no ámbito da ciberseguridade entre académicos, investigadores e empresas. Nesta edición, as xornadas centraranse en tres eixos: investigación, transferencia e formación en ciberseguridade“, indicaron desde a organización.

“No últimos catorce anos, desenvolvemos máis de 45 proxectos no ámbito da ciberseguridade. Hoxe 30 dos nosos 160 profesionais están dedicados a xerar novas innovacións e solucións de seguridade e privacidade. Organizar estas xornadas é un impulso para seguir crecendo neste ámbito”, indicou o director xeral de Gradiant, Luís Pérez-Freire.

As xornadas celébranse coa colaboración da Axencia para a Modernización Tecnolóxica de Galicia, o Nodo Galego de Ciberseguridade Ciber.gal, a Rede de Excelencia Nacional de Investigación en Ciberseguridade RENIC, Optar Solutions, ViewNext e a Cátedra R en Ciberseguridade.