A presidenta do PP de Vigo e candidata á Alcaldía, Marta Fernández-Tapias, propuxo este venres estender a gratuidade do bus urbano a estudantes, universitarios e colectivos vulnerables, que na actualidade xa reciben algún tipo de bonificación.
Así o sinalou a tamén delegada da Xunta en Vigo tras manter un encontro con representantes do ámbito da mobilidade na cidade, aos que lles avanzou algunhas das súas propostas nesta materia.
Segundo ela, estas iniciativas, na súa maioría, están pensadas para corrixir a ausencia dunha boa planificación urbana por parte do PSOE municipal e como alternativa para acabar co “caos” de tráfico.
Entre outras accións, Fernández-Tapias anunciou que tratará de aumentar as axudas do ‘Bono Taxi’ para as persoas con discapacidade ata os 120 euros ao mes. Ademais, indicou a necesidade de redeseñar o mapa do autobús urbano, reforzando as conexións, os horarios e as frecuencias a parroquias e lugares de interese ou de gran afluencia, entre os que se referiu ao aeroporto, a estación intermodal, os centros sanitarios e de traballo ou as praias.
A candidata ‘popular’ subliñou que nos primeiros 100 días de goberno encargará un Estudo sobre o Tráfico e a Mobilidade, que servirá de punto de partida para reformular o modelo urbano e corrixir a “nefasta” xestión municipal.
Así mesmo, Fernández-Tapias prometeu a creación de 5.000 novas prazas de estacionamento, a construción de cinco parking soterrados e o incremento das zonas de aparcadoiro disuasorio.
