A Consellería de Infraestruturas e Mobilidade adxudicou por case 1,3 millóns de euros o contrato para as obras da primeira fase de humanización da Avenida de Galicia de Vigo.

En concreto, segundo informou a Xunta nun comunicado, a empresa adxudicataria foi Marconsa, Movemento de Áridos e Construcións de Arousa, que terá un prazo de execución de 12 meses a comezar previsiblemente na segunda quincena de abril.

Precisamente a delegada territorial do Goberno galego en Vigo, Marta Fernández-Tapias, subliñou que o Executivo autonómico busca fomentar a mobilidade sustentable nesta vía de entrada á cidade, a través de actuacións de retardación do tráfico rodado e a mellora dos itinerarios peonís.

“Esta actuación é unha proba máis do compromiso firme da Xunta co barrio vigués de Teis”, reivindicou. O departamento de Infraestruturas da Xunta prevé finalizar a actuación cunha segunda fase que complete a mellora da estrada ata o límite con Redondela, cuxo proxecto xa foi aprobado e contará cun investimento de 4,1 millóns de euros.