O alcalde de Vigo, Abel Caballero, trasladou este luns o seu “entusiasmo” despois de que o Ministerio de Transportes, Mobilidade e Axenda Urbana (Mitma) dese a coñecer o fin de semana as alternativas para a futura execución do saída sur ferroviaria da cidade.

Nunha rolda de prensa, o rexedor olívico celebrou que “o Goberno de España segue cumprindo coa cidade”, a pesar de quen “dicían que isto estaba parado”. Abel Caballero recalcou que as alternativas do saída sur postas sobre a mesa satisfán as súas demandas, de maneira que o túnel que chega á estación de Urzáiz continuará, baixo terra, ata saír no Porriño. “O túnel ten que saír de Vialia e non verse en Vigo (…) foi unha condición que eu impuxen”, asegurou.

O alcalde insistiu en que, se fóra polo PP, a cidade quedaría sen saída sur, porque o Goberno ‘popular’ proxectara unha chegada do trazado en superficie, imposibilitando que a terminal de Vigo fose estación pasante. Na mesma liña, referiuse ao AVE Vigo-Ourense-Madrid por Cerdedo, que se atopa “en avaliación por parte da Confederación Hidrográfica Miño-Sil” e, por tanto, “en marcha”.