Reyes Díaz Lambarri é a nova directora de Procesos de Soporte do Servizo Galego de Saúde (Sergas) na área Sanitaria de Vigo, despois de que este venres o Diario Oficial de Galicia (DOG) publicase a resolución da convocatoria pública para cubrir este posto directivo.
Tratábase dunha convocatoria polo sistema de libre designación deste posto, de conformidade co establecido no decreto de provisión de prazas de persoal estatutario do Sergas. Díaz Lambarri foi directora da Atención Primaria de Vigo desde finais de 2020 ata que abandonou o posto a comezos deste ano por decisión persoal. Tras pasar pola base medicalizada do 061 en Ourense, toda a súa carreira estivo ligada á Atención Primaria na área viguesa.
Díaz Lambarri exerceu como médico de familia no centro de saúde de Rosalía de Castro e no Punto de Atención Continuada (PAC) de Vigo e tras iso ostentou varios cargos dentro do Sergas.Precisamente tamén este venres o Sergas anunciou a convocatoria pública para a provisión do posto de director de Atención Primaria da área Sanitaria de Vigo.
