Axentes da Policía Local de Vigo, nun operativo con apoio da Policía Nacional, detiveron a unha muller. A.L.F., de 39 anos de idade, como suposta autora dun delito de violencia no ámbito familiar, tras ameazar e golpear ao seu exparella e a un compañeiro de piso deste.

Segundo informaron fontes policiais, os feitos ocorreron na tarde do pasado domingo, cando unha persoa informaba ao 092 de que unha muller entrara na súa casa empuñando un coitelo, rompendo todo o que se atopaba e ameazando aos moradores da vivenda, no Camiño da Garrida.

Unha vez no lugar, os axentes entrevistáronse cunha das supostas vítimas, que relatou que a muller era a súa exparella, coa que finalizara a relación debido aos malos tratos que ela lle dispensaba. Así, mostrou aos policías arañazos nos brazos e explicou que ese día, a muller ameazáralles de morte a el e ao seu compañeiro de piso, facendo ademán de cravarlles un coitelo.

A sospeitosa atopábase no lugar e non só recoñeceu as ameazas, senón que tamén admitiu que golpeara aos dous cun bate. Por estes feitos, procedeuse á súa detención como suposta autora dun delito de violencia no ámbito familiar.