Investigadores do centro atlanTTic da UVigo e a empresa Balidea presentaron este luns o proxecto falAI, para a recollida de voces que permitan ‘ensinar’ ás tecnoloxías a falar e entender a lingua galega.

Así, co hashtag #A30frases búscase a participación do maior número de persoas posible para que, de forma anónima, graven a súa voz lendo 30 frases indicadas na plataforma falai.balidea.com. O obxectivo é compoñer un ‘corpus’ lingüístico que permita adestrar a un asistente conversacional por voz.

A investigadora Laura Docío sinalou que a meta é conseguir 6.000 participantes, cumprindo co criterio de que 30 horas de gravación correspondan a maiores de 50 anos, 10 horas correspondan a cada provincia e cun equilibrio de xénero do 40-60 %.

A recollida de voces en galego permitirá tamén xerar ‘datasets’ en dominios como a saúde ou os trámites administrativos. O proxecto tamén pretende levar a cabo un estudo que sirva de guía no deseño e posta en marcha de axentes conversacionales por voz en linguas con baixos recursos, de maneira que se ‘adestre’ aos algoritmos de aprendizaxe que usan estes axentes.

“FITO IMPORTANTE NO ÁMBITO TECNOLÓXICO”

Na presentación do proxecto, a vicerreitora de Comunicación e Relacións Institucionais, Mónica Valderrama, explicou que, para a institución académica “é un auténtico orgullo” un proxecto como falAI; mentres que o director xeral de Balidea, Lorenzo Rodríguez, sinalou que esta iniciativa é “un fito importante tecnoloxicamente” e tamén por ser en galego.

No acto de presentación tamén participou o alcalde de Vigo, Abel Caballero, que convidou aos cidadáns a participar no proxecto, que permitirá que o “diálogo permanente” que se ten coa tecnoloxía na actualidade, poida ser “en nosa propia lingua e co noso propio acento”.