Os investigadores Mariano Lastra (Departamento de Ecoloxía e Bioloxía Animal, e científico do CIM-UVigo), Jesús Souza e Jesús López (CIM-UVigo), e Iván Franco (doutor pola UVigo e investigador postdoctoral na Universidade de Cádiz) forman parte da expedición que, entre o 17 de febreiro e o 17 de marzo, desenvolverá unha campaña na Antártida para estudar, por primeira vez, o efecto da radiación ultravioleta nas macroalgas, ao amparo do proxecto Radiant, financiado con 50.000 euros polo Plan Nacional de I+D.
Este proxecto está asociado á 36ª Campaña Antártica Española e é unha continuación de iniciativas anteriores. Segundo explicou Mariano Lastra, durante as 4 semanas que dura a campaña, na base Gabriel de Castela de Illa Decepción, realizarase un “experimento de manipulación do medio natural”.
Así, quentaranse substratos, macroalgas que están varadas nas praias da illa, a diferentes temperaturas, para observar reaccións de descomposición de materia orgánica, emisións de CO2, liberación de nitróxeno e fósforo. Como novidade, engadiu, nesta ocasión (xa participaron en campañas antárticas anteriores) introducirase a variable da radiación ultravioleta durante un número de horas “para tratar de estudar que efecto combinado ten a temperatura e a radiación na descomposición da materia orgánica”.
A realización deste experimento responde á hipótese xeral de que, canto menos xeo (tanto espacial como temporal), máis iluminación chega ao fondo, “o que fai que todo o que sexan organismos fotosintéticos teñan máis tempo para desenvolverse, para proliferar”. Isto afecta o fitoplancto, ás algas e ao aumento da produtividade primaria, que pode beneficiar a certas especies e repercutir no crecemento das macroalgas.
Lastra, Troncoso, López e Franco atópanse en Punta Areas (Chile), á espera de voar a Illa Rei Jorge desde onde, nun barco búlgaro, serán trasladados a baséea Rei Juan Carlos I e logo a Illa Decepción.
DA ANTÁRDIDA A CORRUBEDO
Durante o mes de permanencia na Antártida, os investigadores da UVigo continuarán coas mostraxes dunha ducia de praias nas que están a traballar desde 2004. “Imos repetir medicións do estado morfodinámico da praia”, sinalou Mariano Lastra.
Pero o traballo destes científicos ten continuidade en Galicia, no complexo dunar de Corrubedo, en Ribeira. Alí, replican ao detalle o mesmo que fan na Antártida, para poder ensaiar metodoloxía e protocolo do experimento e para, ademais, poder comparar os resultados en latitudes diferentes.
