O Concello de Vigo indemniza en máis de 9.000 euros a unha muller maior que, o pasado 5 de agosto de 2021, sufriu unha caída na vía pública, ao bater cunha lousa levantada na rúa Aragón.
A muller, a través da súa letrada, Ana Quiroga (directora fundadora de QV ABOGADOS), presentou unha reclamación ante a administración municipal, que estimou a súa petición de responsabilidade, aínda que fixou a indemnización en algo menos do que reclamaba a prexudicada.
Na súa resolución, o Concello admite como acreditado que a muller sufriu unha caída no lugar e o momento referido, tal e como figura nos informes policiais. Así mesmo, recoñece os danos que esta sufriu, aínda que fai unha valoración, a través dun perito externo, lixeiramente inferior.
Con respecto á relación de causalidade entre o accidente e o estado da beirarrúa, sinala que “resulta obvio” que había un dano na vía pública sen sinalizar (tal e como se reflicte nas fotografías do atestado policial), polo que estima a reclamación e fixa unha indemnización de 9.112,49 euros, en base aos danos e secuelas da reclamante.
