A sección quinta da Audiencia Provincial de Pontevedra, con sede en Vigo, xulgará o vindeiro martes, día 7 de febreiro, a un acusado de utilizar billetes falsos como método de pago na cidade olívica.
Por iso, Fiscalía solicita unha pena de 4 anos e 6 meses de prisión por un delito de tenencia de moeda falsa para a súa distribución ou posta en circulación e por un delito leve continuado de estafa.
Ademais, pide que ao acusado lle sexa imposta unha multa de 479 euros, así como o comiso dos billetes inauténticos e as copias de hologramas intervidos na investigación.
Segundo explica o Ministerio público no seu escrito de acusación, os feitos remóntanse a 2015, cando o home, “con ánimo de obter un proveito económico”, entregou a un camareiro un billete falso de 50 euros. Cando o profesional se decatou de que non era válido, fíxollo saber ao acusado, que fuxiu do lugar.
Con todo, foi interceptado, levando consigo máis de 200 euros en billetes falsos. Días despois, volveu realizar as mesmas accións noutros establecementos.
Tras a súa investigación e o rexistro da súa habitación, interviñéronse varios billetes falsos, unha impresora, hologramas e demais elementos necesarios para a creación do diñeiro inválido.
