Vixiantes de seguridade dun centro comercial vigués auxiliaron o pasado sábado a un cliente que comezou a sentirse indisposto grazas ao uso dun desfibrilador e o seu posterior traslado a un centro hospitalario.
Segundo informou UXT, os feitos ocorreron ao mediodía, na planta sexta do Corte Inglés de Vigo, onde unha persoa empezou a atoparse mal e foi atendido polo persoal de seguridade que “lle salvou a vida”. Apoiados por outra clienta, dada a gravidade do estado da persoa e ante os síntomas que sufría, optaron pola utilización do desfibrilador e solicitaron presenza médica.
“A rápida actuación dos vixiantes e o posterior trasladado do paciente ao hospital foi fundamental para evitar un posible fatal desenlace”, reivindicou o sindicato, que aproveitou a ocasión para reivindicar a formación como “alicerce fundamental” para “dignificar e profesionalizar” o sector da seguridade privada. Así mesmo, solicitaron á Administración que se lles conceda a estes vixiantes unha mención pola súa actuación.
