O alcalde de Vigo, Abel Caballero, volveu a reivindicar este venres o impacto da campaña do Nadal da cidade, e proclamou que “cando as luces do Nadal de Vigo acenderon, o Xacobeo desapareceu do mapa social e do mapa visible”.

O rexedor olívico fixo estas declaracións nunha rolda de prensa, na que se referiu á nova homenaxe que lle brindaron hostaleiros e comerciantes, en agradecemento polos bos resultados desa campaña.

Así, Caballero apuntou que hostaleiros e comerciantes da cidade e a provincia, que dan emprego “a 30.000 persoas”, son “a cara visible” do Nadal de Vigo, que “fan que a xente goce e sexa inmensamente feliz”. “Son a garantía de que o Nadal de Vigo vai continuar”, engadiu.

Tras volver insistir nas cifras de visitantes durante eses dous meses, “posiblemente máis de 3 millóns de persoas”, o alcalde reiterou que o Nadal da cidade escureceu ao Xacobeo, porque “o encheu todo en Galicia e en España”, e mesmo é “unha actividade de rango mundial”.

DESESTACIONALIZACIÓN

Dous días despois de que a delegada da Xunta, Marta Fernández-Tapias, mantivese unha reunión con organizacións de hostaleiros para estudar medidas que desestacionalicen o turismo na cidade, o alcalde asegurou que Vigo é destino preferente xa todo o ano, tanto en Nadal, como en eventos como a Reconquista, no verán ou en fins de semana.

“Somos a cidade de España co turismo máis desestacionalizado”, proclamou, e repetiu que todo iso se logrou “sen axuda da Xunta” que, moi ao contrario, “tentou parar o Nadal”.

Segundo o alcalde, a Xunta, a delegada e “candidata” e os seus “apéndices políticos” quixeron facer fracasar a campaña do Nadal, do mesmo xeito que o BNG. “Xa sabemos que temos inimigos aquí”, incidiu, en alusión a estas dúas formacións políticas, e advertiu de que o goberno local xa está a preparar as campañas de Nadal dos próximos anos, que serán “máis e mellor” e das que non quixo adiantar nada porque “todo o mundo quere copiar a Vigo”.