O vicepresidemte primeiro e conselleiro de Economía, Industria e Innovación, Francisco Conde, animou este xoves ao tecido empresarial e ao Goberno central a colaborar para que os fondos europeos sexan “unha verdadeira oportunidade” para a transformación de Galicia.
Así o manifestou durante a súa intervención no Foro AJE-Galicia, celebrado no parque empresarial de Porto do Molle en Nigrán.
Conde destacou que a formación será unha das claves para acceder ás oportunidades dos fondos da UE e “abrir paso” á economía ‘verde’ e do coñecemento. Respecto diso, apuntou que empresas e emprendedores deben cooperar nesa formación para achegar valor engadido ao seu negocio, adaptarse aos cambios e compasar a transformación dixital e sustentable coa capacitación do seu capital humano.
O vicepresidente económico da Xunta tamén se referiu ás oportunidades que se abren coas axudas, aínda que lamentou a xestión do Executivo central pola “falta de información, a rixidez dos requisitos, o escaso efecto incentivador das axudas e a imposibilidade de encaixar proxectos”.
Nese sentido, volveu reclamar que se permita ás Comunidades Autónomas participar na definición dos proxectos estratéxicos para que os territorios non queden fóra da repartición, e máis marxe de manobra cun marco regulatorio “flexible e áxil” para as empresas.
