InicioVal MiñorNigránHomenaxe a Darío Xohán Cabana en Nigrán con música e poemas

Homenaxe a Darío Xohán Cabana en Nigrán con música e poemas

A cita terá lugar este venres e correrá ao cargo da plataforma Lucenza-Ateneo, que aproveita para se presentar ao público.

PUBLICADO O

Nigrán contará cunha nova asociación cultural, Lucenza-Ateneo, que se estreará este venres 28 de xaneiro cunha homenaxe musicada ao poeta Daría Xohán Cabana. A cita terá lugar ás 20:00 horas no auditorio municipal e contará, entre as súas filas, ao presidente da nova plataforma, Xabier Méndez, xunto con algúns membros da entidade, explicarán ao público os obxectivos e actividades programadas nos vindeiros meses.

Segundo apuntan dende Lucenza-Ateneo de Nigrán, a homenaxe consistirá na lectura de varios poemas de Darío Xohán Cabana que se verá acompañada con música en directo. Actuará así Jorge Vilas á frauta traveseira e Adrián Lamek Méndez ao acordeón. “Animarase, así mesmo, aos veciños á participación nesta asociación e abrirase tamén un tempo de coloquio entre as persoas asistentes”, destacan.

A plataforma Lucenza – Ateneo de Nigrán botou a andar hai uns meses, “a partir do sentir compartido dun grupo de veciñas e veciños das diferentes parroquias de Nigrán”, que segundo apuntan consideraron conveniente poñer en marcha unha entidade sociocultural que se centre en organizar actividades a nivel municipal para beneficio de toda a veciñanza.

“O ateneo de Nigrán nace coa ilusión e co compromiso de convertirse nun espazo aberto, libre, plural e amigable, que dea cabida a todas aquelas persoas dispostas a cooperar, achegando o seu compromiso, o seu tempo, o seu coñecemento e as súas habilidades en beneficio da cultura, da xente e do territorio”, inciden.

Polo tanto, o obxectivo da plataforma é contribuír “modestamente” á escena cultural de Nigrán e solventar así certas “eivas” que se continúan a padecer no municipio, segundo apuntan. Aínda que Lucenza foi fundada a comezos do pasado ano, en tempo de confinamentos e dificultades para desenvolver actividade pública, leva xa uns meses poñendo en marcha as súas primeiras iniciativas, como o programa de andainas guiadas polo territorio ou a posta en marcha do Clube de lectura “Compartindo libros”.

Lucenza continuará a desenvolver durante este ano que comeza novas iniciativas e actividades, principalmente centradas en asuntos como a difusión da historia local, o coñecemento do territorio, concienciación e defensa do patrimonio, o medio ambiente e a paisaxe;  a promoción da creación cultural e da cultura popular, actividades de lecer e socialización, a promoción do uso do galego,  a abordaxe de debates que afectan á nosa xente, e calquera outras accións que axuden ao fomento do coñecemento e do pensamento crítico e democrático na sociedade.

ÚLTIMAS

Abel Caballero celebrará un pleno extraordinario contra o “veto por ideoloxía” a varias relatoras nun programa da Deputación

O alcalde de Vigo, Abel Caballero, anunciou este venres que a próxima semana convocará un...

A Xunta Electoral arquiva unha denuncia do PP por declaracións de Hereu na súa visita a Redondela e Vigo

A Xunta Electoral de Galicia decretou o arquivo dunha denuncia formulada polo PPdeG en...

O Porto de Vigo pecha xaneiro como líder nacional en movemento de vehículos, con 55.801 unidades

O Porto de Vigo pechou xaneiro deste ano arrebatando o liderado en movemento de vehículos á...

O cadáver da muller achada nunha maleta presenta unha puñalada e aínda non puido ser identificada

A autopsia realizada ao cadáver da muller achada dentro dunha maleta nunha leira abandonada...