Os pacientes ingresados debido á Covid-19 no conxunto de Galicia incrementáronse ata os 214, o que supón dez máis que a xornada anterior, mentres que os novos contaxios caen por baixo dos 200 ata os 141 e os casos activos descenden lixeiramente a 3.015 despois de cinco xornadas consecutivas con tendencia ascendente. Así se desprende dos datos actualizados na mañá deste luns pola Consellería de Sanidade, con rexistros ata as 18,00 horas deste domingo, nos que se indica que baixan a 45 os pacientes Covid en UCI, un menos, e soben a 169 os doutras unidades, 11 máis.

Concretamente na área sanitaria de Vigo, mantéñense un total de oito pacientes en críticos e ascenden a 39 os doutras unidades –catro máis–. Ademais, a área viguesa é a que rexistra máis casos activos, con 878 tras unha suba de 4 persoas. Do total de positivos detectados en Galicia, 31 corresponden a Vigo, de maneira que os contaxiados totais ascenden a 23.434.

Desde o inicio da pandemia, Galicia realizou 2.016.232 PCR, o que supón 7.130 probas máis que as contabilizadas ata a xornada anterior. E a taxa de positividade mantense por baixo do dous por cento en Galicia cun 1,8% no inicio desta semana, polo que segue sen superar o 5% que a Organización Mundial da Saúde (OMS) fixa para dar por controlada a pandemia.