Estupor, así describen membros de equipos directivos de ensino da área viguesa dende que o SERGAS ante o xeito en que ten a Xunta de comunicar os positivos nos centros. A golpe de comunicado de prensa e sen contrastar a información cos propios centros de ensino.

A Xunta de Galicia e Extremadura son as dúas administracións autonómicas máis opacas do Estado no relativo a ofrecer o acceso aos datos públicos sobre a evolución da pandemia, motivo polo que foi reprimida públicamente polo colexio de Xornalistas de Galicia.

“Galicia é neste momento, xunto a Extremadura, a autonomía máis opaca” na comunicación destes datos e “só algús autos xudiciais feitos públicos polo Tribunal Superior de Xustiza de Galicia permiten coñecer parcialmente algúns datos pormenorizados” aseguraron dende o organismo profesional galego.

Mostra desa opacidade é a situación que viven algúns centros de ensino galegos, onde nais e pais e os propios centros entéranse pola prensa que o centro escolar de referencia aparece no listado ofrecido polo SERGAS nos seus comunicados diarios de positivos por COVID19

Así o pasado 19 de setembro aconteceu en Nigrán, no Colexio Estudio en Chandebrito, onde o centro tivo que publicar unha nota de aviso, logo de enterarse que o centro aparecía no listado do SERGAS sen que o centro tivese constancia de ningún positivo no inicio do curso.

O mesmo acontecía o pasado día 22 de setembro no colexio CEIP Fontes – Baiña de Baiona, onde a directiva do centro acolleu a información na prensa con sorpresa e tiveron que enviar un comunicado ás familias aclarando a información.

Ao día seguinte o SERGAS eliminaba o CEIP de Fontes-Baiña do seu listado. Varios centros desaparecían sen aclaración algunha da listaxe de casos trasladado pola Xunta, en concreto eran o CEIP Plurilingüe Eladia Mariño de Cabanas, o IES de Fene, o IES Manuel García Barros da Estrada, o CEIP Castelao de Vigo e o CEIP Fontes-Baíña de Baiona.

E o mesmo volveu a acontecer no día de hoxe no IES Escolas Proval no Val Miñor, a directiva do centro tivo que publicar un comunicado na súa web polo mesmo motivo logo de que o comunicado de prensa do SERGAS apuntase a 2 positivos no centro. Trátanse de dous alumnos pendentes de coñecer os resultados das probas PCR que non se incorporaron ás clases.

Este tipo de situacións están provocando por un lado inquedanza nas familias e unha carga adicional de traballo dos servizos de atención ao público dos propios centros onde atenden chamadas de pais e nais ante a información, errónea nestes casos, trasladada dende os gabinetes de comunicación da Xunta.