A Consellería de Política Social da Xunta de Galicia, rexeitou o dereito de adaptar o horario laboral dunha traballadora da Residencia de Tempo Libre de Panxón (Nigrán) dependente da mesma consellería. Unha situación paradóxica logo de que a propia consellería teña entre as súas prioridades precisamente a conciliación e as axudas ás familias monoparentais con fillos menores a cargo.

O Tribunal Superior de Xustiza de Galicia (TSXG) desestimou un recurso de suplicación que presentou a Consellería de Política Social contra unha sentenza que recoñecía o dereito dunha traballadora a adaptar a súa xornada, para conciliar a súa vida laboral e familiar.

A traballadora desempeña o seu labor desde 2019 como limpadora da Residencia de Tempo Libre de Panxón, dependente da Consellería de Política Social, en quendas alternas de mañá e tarde. En outubro de 2023 solicitou adaptar a súa xornada, para traballar só en horario de mañá, para conciliar, xa que é nai dun fillo menor de idade ao seu cargo e familia monoparental, pero a súa petición foi denegada.

No seu momento, a Consellería alegou que a residencia é un centro de “actividades descontinuas ao longo do ano”, e que as camareiras limpadoras levan a cabo tarefas de luns a domingo en quendas de mañá e tarde. Segundo a relación de postos de traballo todos os postos dese colectivo teñen recoñecido un complemento salarial de singularidade de especial dedicación que retribuye o traballo a quendas, expuxo a administración.

Política Social presentou recurso de suplicación e o alto tribunal galego rexeitouno nunha resolución do pasado 19 de xuño, facendo seus os argumentos da primeira sentenza, e lembrou que esa obrigación de negociar e justificar a negativa é “tan clara e evidente que non necesita maior xustificación”, e se non se respecta, a negativa é “inxustificada”. “Se a empresa non puidese ser compelida a cumprir a dita obrigación, esta non sería tal, senón papel mollado”, sinala a resolución do TSXG.