A catedrática de Física Aplicada da Universidade de Santiago de Compostela (USC) María Inmaculada Paz Andrade (Pontevedra, 1928) faleceu nas últimas horas, segundo informou a Universidade de Vigo (UVigo), que a nomeou doutora honoris causa en 2018.
Considerada unha referencia mundial nos ámbitos da microcalorimetría e calorimetría diferencial de varrido, Paz Andrade foi a primeira muller nomeada visiting research professor da Universidade de Manchester, en 1979.
Antes, fora tamén a primeira profesora adxunta interina na USC, en 1964. Ademais, en 1983 converteríase na primeira catedrática de Física Aplicada e tres décadas despois sería recoñecida como a primeira investigadora coa medalla de ouro da Real Sociedade Española de Física.
O 2 de maio de 2018, aos 89 anos de idade, converteuse na primeira pontevedresa nomeada doutora honoris causa pola UVigo.
