Unha persoa resultou ferida nunha colisión entre tres vehículos ocorrida este venres na autoestrada AP-9 ao seu paso pola localidade de Redondela. O accidente, que involucrou dous turismos e un camión de transporte, tivo lugar no quilómetro 151 de vía.

Un particular alertaba ao CIAE 112-Galicia pasados escasos minutos das 15,00 horas, informando dunha colisión nas proximidades do túnel previo á ponte de Rande. Os vehículos obstaculizaban un dos carrís de circulación e quedaran restos materiais esparexidos polo asfalto.

Tras finalizar a súa intervención, o persoal de Urxencias Sanitarias de Galicia-061 confirmou ao 112 o traslado dunha persoa ferida. Pola súa banda, as outras cinco que se viron implicadas na colisión resultaron ilesas. Ademais dos servizos sanitarios, o 112 tamén solicitou a intervención da Garda Civil de Tráfico e dos servizos de mantemento das estradas.