O corpo achado sen vida na mañá deste pasado mércores nunha zona rochosa próxima a Cabo Home corresponde á muller de 52 anos de Moaña desaparecida desde o xoves, 3 de novembro.

Así o confirmaron fontes da Garda Civil consultadas por Europa Press, que aseguran que “o corpo foi atopado sen sinais de violencia” polo que a principal hipótese da investigación apunta a que a muller pretendese acabar coa súa vida.

O achado do corpo tivo lugar nunha zona rochosa moi próxima ao lugar no que fora atopado o coche da desaparecida, unha traballadora do centro de saúde de Moaña.

A Garda Civil levaba días buscando á muller, con axuda de axentes de policías locais da zona, despois de que a súa parella denunciase a súa desaparición tras manter con ela unha discusión.

Ademais, familiares, amigos, veciños e compañeiros de traballo da muller envorcáronse na súa procura a través das redes sociais para tratar de conseguir calquera información que lles axudase á súa localización.