Axentes do Grupo de Investigación de Incendios da Policía Autonómica en Vigo, en colaboración con axentes ambientais da Unidade de Investigación de Incendios Forestais (UIFO) detiveron a unha persoa como presunta responsable do incendio que afectou o municipio pontevedrés de Ponteareas en agosto.
O lume, lembra a Xunta nun comunicado, rexistrouse o 28 de agosto na parroquia de Cristiñade e afectou a 300 metros cadrados de superficie arboredo.
Destacan ademais que o detido xa fora apresado “por feitos similares en épocas anteriores”. As dilixencias iniciáronse, detallan, grazas á información achegada polos axentes ambientais da UIFO de Medio Rural, así como pola colaboración cidadá, “xa que o presunto autor foi detectado nas inmediacións do punto de inicio do lume”. O atestado policial xa foi remitido ao Xulgado de Instrución Número 1 de Ponteareas.
