A sección sexta da Audiencia Provincial de Pontevedra ratificou a sentenza de instancia que acordou a “privación total da patria potestade” sobre os seus fillos a César Adrio, condenado a máis de 30 anos de prisión polo asasinato en Vigo da nova enxeñeira Ana Enjamio.
Un xulgado de primeira instancia acordou privar deste dereito a César Adrio por “incumprimento grave” dos seus deberes, ao non atender ao sustento dos seus fillos, ao ser condenado por un delito grave, e tendo en conta o superior interese dos menores (un dos cales expresou explicitamente o seu rexeitamento a manter calquera relación co seu pai).
A representación xurídica de César Adrio presentou recurso, alegando que non podía colaborar na manutención dos seus fillos (fixada na sentenza de divorcio) porque estaba en prisión, e que a privación da patria potestade supón un “novo castigo” para el, que xa está a cumprir condena polo asasinato.
A Audiencia, no entanto, confirmou a sentenza nunha resolución de maio pasado, ao considerar que o condenado non fixo “nin un só intento de colaborar no sustento económico” dos seus fillos, nin sequera cando a sentenza foi firme e puido desenvolver algún traballo remunerado en prisión. Ademais, “non acreditou que careza de recursos”.
“NON ESTÁ EN CONDICIÓNS DE VELAR POLOS SEUS FILLOS”
Por outra banda, o tribunal provincial fai fincapé na gravidade dos feitos polos que foi condenado a prisión, tras asasinar a unha muller nova, coa que tivera unha relación sentimental, e á que “estivo hostigando durante meses”. “Quen actúa así non está en condicións de velar polos seus fillos, nin de proporcionarlles unha formación aceptable”, recolle a sentenza.
“Este tribunal non pode abstraerse deses feitos, especialmente graves”, sinalou a Audiencia, que apuntou que “un dos máis graves incumprimentos dun proxenitor cos seus fillos é atentar contra a vida”, o que implica “unha falta total de respecto á integridade dos menores” que, ademais neste caso, “resultaron afectados psicoloxicamente” polo que fixo o seu pai.
César Adrio foi condenado pola Audiencia de Pontevedra (en base ao veredicto dun xurado) a 30 anos e 4 meses de cárcere por un delito de asasinato, un de acoso e outro de vulneración da intimidade, tras asestar case unha trintena de puñaladas á moza Ana Enjamio, con quen tivera unha relación sentimental, na madrugada do 17 de decembro de 2016.
A sentenza foi ratificada posteriormente polo Tribunal Superior de Xustiza de Galicia (TSXG) e polo Tribunal Supremo, aínda que este rebaixou a pena nun ano ao retirar a agravante de discriminación por motivo de xénero no delito de asasinato.
