Unha persoa resultou ferida ao envorcar o tractor que conducía en Oia. Foi trasladada ao Hospital Álvaro Cunqueiro de Vigo para ser atendida polos servizos sanitarios.Segundo informa o 112, un particular alertaba esta mañá, ao fío das 11,30 horas, dun accidente nunha das baixadas ao cámping de Mougás. Escoitaba a unha persoa solicitando unha ambulancia, pero descoñecía a natureza do suceso.
Foi esa mesma persoa a que, momentos despois, puido comprobar que se trataba dun tractor que acababa de envorcar. A persoa que conducía o vehículo parecía estar ferida, aínda que non atrapada.
Urxencias Sanitarias de Galicia-061 enviou unha ambulancia ao lugar para trasladar á persoa accidentada ao centro hospitalario de referencia. Ademais dos servizos sanitarios, acudiron ao cámping de Mougás efectivos da Garda Civil de Pontevedra. Foron informados os Bombeiros do Porriño e o GES da Guarda.
