A sección segunda da Audiencia Provincial de Pontevedra ditou sentenza na que condena a penas de entre 4 e 8 anos de prisión a tres dos acusados polo transporte de 30 quilos de cocaína ocultos no pesqueiro ‘New Polar’ (entre eles ao cociñeiro, de Cangas do Morrazo), e absolve os outros tres procesados.

Así, o tribunal considera o cociñeiro do barco autor dun delito de tráfico de drogas, aplícalle a atenuante de confesión e condénao a 4 anos de cárcere e ao pago dunha multa de 600.000 euros. Así mesmo, condena ao destinatario da droga a 8 de cárcere e a pagar unha multa de 1,2 millóns de euros, ao ser reincidente; e impón 6 anos de prisión ao intermediario dos provedores da cocaína, así como multa de 1,2 millóns de euros.

Con respecto aos outros tres acusados, a Audiencia absólveos ao determinar a invalidez das probas contra eles, xa que se baseaban no envorcado de datos do teléfono do cociñeiro do barco, e non se puido asegurar a cadea de custodia do terminal nin garantir que non fose manipulado.

Precisamente por iso, o tribunal considera que non quedou acreditado que os acusados integrasen un grupo criminal, polo que resolveu absolvelos a todos con respecto a este delito.

TRANSPORTE DESDE URUGUAI

Segundo a sentenza, resulta acreditado que o cociñeiro do ‘New Polar’, que era confidente da Garda Civil desde uns anos atrás, recollera 30 quilos de cocaína aproveitando unha escala do barco en Montevideo (Uruguai), e que a ocultou no pesqueiro con intención de, unha vez de volta en España, entregarlla a un intermediario que xa pactara a venda ao destinario final.

O pesqueiro chegou ao porto de Cangas o 22 de maio de 2019 e o propio cociñeiro chamou aos seus contactos na Garda Civil para confesar que transportaba no barco esa droga e darlles indicacións de onde estaba. Así, o 24 de maio, axentes do Instituto Armado, con autorización do capitán do ‘New Polar’, accederon á nave e interviñeron a cocaína.

PRESUNTAS IRREGULARIDADES

Os maxistrados fan constar na súa sentenza que “sorprende” que os axentes que detiveron o cociñeiro non precintaron inmediatamente o seu teléfono e non se pode garantir a autenticidade dos datos que se obtiveron no posterior envorcado.

Esta irregularidade determinou o resultado do procedemento, xa que a Audiencia declarou nulas as intervencións telefónicas que se autorizaron en base a esa información, e acabou absolvendo a tres dos acusados.

Así mesmo, pon de manifesto que, durante o xuízo, estes dous axentes (un capitán e un sarxento da UCO) “incorreron en contradicións e ambigüidades, silenciando feitos de relevancia”. Así, remarca que o trato dado ao cociñeiro tras a súa detención “non se corresponde cos protocolos policiais”, que non aclararon cuestións relacionadas coa investigación, que tiñan información previa “de relevancia para a causa” que non achegaron, ou que mesmo se reuniron coa muller e a filla do procesado, ás que desvelaron parte das dilixencias secretas e ás que aseguraron que negociarían coa Fiscalía para pactar unha pena que non supuxese ingreso en prisión.

Por todo iso, a Audiencia decreta na súa sentenza que, unha vez sexa esta firme, se deduza testemuño da declaración presentada no xuízo por estes axentes, ambos os dous como testemuñas, “para o efecto da súa remisión ao Decanato dos Xulgados de Instrución de Pontevedra, por se puidesen incorrer ambos nun delito de falso testemuño”.