InicioSucesosDetido en Vigo un home como responsable de máis de duascentas estafas...

Detido en Vigo un home como responsable de máis de duascentas estafas mediante a apertura de contas ‘en liña’

Entre os efectos intervidos tamén se atopan máis de 100 DNI falsificados, permisos de conducir, máis de 120 cartóns SIM de distintos operadores.

PUBLICADO O

- Advertisement -

A Policía Nacional detivo en Vigo a un home como presunto autor de máis de duascentas estafas cometidas a través de Internet mediante a apertura de contas bancarias ‘en liña’.

Tal como informou este corpo de seguridade, a investigación comezou cando os axentes tiveron coñecemento da comisión de varias estafas bancarias a través das denuncias de prexudicados, nas que comunicaban ser vítimas do baleirado das súas contas ou da transferencia ou retirada en caixeiros de diñeiro das mesmas, sen atopar explicación algunha, xa que en ningún momento autorizaran ditas transaccións.

En concreto, as retiradas de efectivo producíronse en contas de persoas falecidas ou de avanzada idade, abrindo contas ao seu nome noutra entidade onde eran desviados os seus fondos, ademais de facer retiradas de efectivo en caixeiros.

“Na maioría dos casos, transcorrera demasiado tempo desde que se comete o feito ata que os afectados se decataran ou denunciaran, polo que xa non era posible recuperar as imaxes dos caixeiros”, indicou a Policía Nacional.

Durante a investigación púidose comprobar que en varias denuncias había datos coincidentes en feitos ocorridos en Vigo e Santiago. Este traballo levou á identificación e localización do presunto autor das estafas, coincidindo os seus trazos físicos e vestimenta coas imaxes captadas en distintas entidades bancarias.

MÁIS VÍTIMAS

Polo momento descoñécese o número de vítimas, xa que a raíz do rexistro efectuado o pasado 21 de xuño os investigadores incautaron gran cantidade de documentación, equipos informáticos e case 23.000 euros en efectivo, “o que induce a pensar que o número de prexudicados pode ser maior ao previsto”.

Ata agora rexistráronse 59 evidencias con gran cantidade de documentación pendente de analizar e clasificar. Ademais, incautáronse un computador de sobremesa, dous portátiles, cinco teléfonos móbiles e tres memorias extraíbles, entre outros aparellos.

Entre os efectos intervidos tamén se atopan máis de 100 DNI falsificados, permisos de conducir, máis de 120 cartóns SIM de distintos operadores, máis de 100 cartóns bancarios ou máis de 200 cartafoles a nome de presuntas vítimas.

Por todo iso, o detido pasou a disposición do Xulgado de Instrución de Vigo, decretando o seu ingreso en prisión, imputándolle varios delitos de estafa, usurpación do estado civil, branqueo de capitais, falsificación de documentos, revelación de segredos e interceptación de correspondencia.

ÚLTIMAS

Concello e deputación acordan reformar a bancada de Gol en Balaídos

A Xunta de Goberno do Concello de Vigo deu este luns luz verde ao...

Tres detidos en Portugal e máis 1.000 quilos de cocaína intervidos nos portos de Sines e Vigo

Unha investigación posta en marcha pola Polícia Judiciária de Portugal e que contou coa cooperación da...

Detectado e eliminado un punto de vertedura de augas residuais en Redondela

Os técnicos do Programa de Control de Verteduras, dependente de Augas de Galicia, detectaron un...

Un atuneiro dunha empresa viguesa, implicado nun naufraxio cun desaparecido nas Galápagos

O atuneiro 'Ría de Aldán', comprado o ano pasado pola viguesa Wofco, viuse implicado nun accidente...