A Fiscalía pide 1 ano e 9 meses de prisión, e multa de 8.100 euros para unha muller que presentou unha denuncia falsa contra a súa exparella, ao que atribuíu unha agresión sexual que non se produciu, e que será xulgada este xoves na sala do Penal 2 de Vigo.
Segundo o escrito de acusación pública, o 9 de marzo de 2021 a acusada presentou denuncia contra a súa exparella, do que dixo que a obrigou a manter relacións sexuais con penetración en dúas ocasións, uns días antes nun hotel da cidade olívica.
A Fiscalía sostén que a muller presentou a denuncia sabendo que os feitos eran falsos, e que o fixo como “represalia” porque non aceptaba o fin da relación. Por estes feitos acúsaa dun delito de denuncia falsa e pide que sexa condenada a 1 ano e 9 meses de cárcere, e a pagar unha multa de 8.100 euros.
