Dous homes foron detidos como presuntos autores da brutal malleira a dous mozos de 20 e 21 anos a finais do mes de xaneiro en Vigo, segundo confirmaron fontes da Policía Nacional.
Así, estes dous homes pasarán a disposición xudicial este martes, despois de máis de 15 días de procura destes dous supostos agresores. Os feitos sucederon sobre as 5 da madrugada do domingo día 30 de xaneiro, cando dous mozos tiveron que ser hospitalizados tras recibir unha malleira na rúa María Berdiales de Vigo.
Cando os axentes chegaron ao lugar, atopáronse con dous mozos de 20 e 21 anos, vítimas da malleira, un deles coa cara ensanguentada e o outro seminconsciente. Pola súa banda, os agresores fuxiran á carreira.
Dous días despois dos feitos, un home foi detido como presunto autor dos feitos, aínda que posteriormente foi posto en liberdade con cargos. Agora, dous homes máis foron detidos.
