Catro persoas resultaron feridas na madrugada deste domingo ao saírse da vía o vehículo no que circulaban e chocar contra outros dous estacionados en Cangas.
Segundo informa o 112, o suceso tivo lugar na Avenida de Ourense, concretamente á altura do número 72, pasadas as 05,15 horas. A esa hora o servizo recibiu a chamada dos axentes da Garda Civil de Tráfico que informaban o sinistro e, na mesma comunicación, xa confirmaba a mobilización dos profesionais sanitarios para atender aos feridos. Así mesmo, solicitaban a colaboración de Protección Civil da localidade para recuperar as condicións de seguridade da vía.
Informouse do ocorrido aos membros do Servizo Municipal de Protección Civil de Cangas que, finalizados os traballos na vía, confirmaron a evacuación de catro persoas por parte dos servizos sanitarios de urxencia ao centro hospitalario.
