A Garda Civil despregou este martes un operativo, coordinado por un xulgado de San Roque (Cádiz), no marco do cal foron detidas polo menos 16 persoas, unha delas en Vigo, contra unha rede de narcotráfico que introduce droga en España procedente de Sudamérica e de Marrocos, segundo confirmaron fontes da investigación.

O operativo foi desenvolvido pola Unidade Central Operativa (UCO) da Garda Civil, e contou coa cooperación, entre outros, da Xendarmería francesa e de Europol. No marco deste despregamento foron detidas polo menos 16 persoas, 14 delas en Cataluña e unha en Vigo.

De feito, confirmaron fontes policiais, o xefe desta rede (unha persoa “importante” no mundo do narcotráfico, e que se mantiña “en segunda liña”) foi arrestado na cidade condal, onde se realizaron unha ducia de entradas e rexistros simultáneos na zona da avenida do Paral·lel. Así mesmo, leváronse a cabo entradas en Cerdanyola del Vallès (Barcelona) e en Cádiz.

A Garda Civil explicou que as forzas de seguridade seguían desde hai tempo a pista a esta organización e que esta operación foi “un fío do que se tirou” a partir de actuacións “que veñen de atrás”, polo que “non houbo grandes aprehensións”.