Un home de 59 anos domiciliado en Vigo faleceu tras sufrir unha saída de vía mentres circulaba nun vehículo pola A-52, á altura do termo municipal de Salvaterra do Miño.

Os feitos tiveron lugar sobre as 20,50 horas deste mércores, cando un particular contactou co Centro Integrado de Atención ás Emerxencias (CIAE 112 Galicia) para alertar de que un vehículo saíu da vía á altura do punto quilométrico 287 da A-52, en sentido Benavente.

Posteriormente, os xestores do 112 Galicia deron aviso do sinistro a Urxencias Sanitarias de Galicia-061, a Garda Civil de Tráfico, os bombeiros de Ponteareas e O Baixo Miño e o servizo de mantemento da vía.

Así mesmo, fontes da Garda Civil trasladaron a Europa Press que o condutor, un home de 59 anos con domicilio en Vigo, sufriu unha saída de vía no termo municipal de Salvaterra de Miño, tras o que o seu vehículo impactou contra o valo metálico de protección.