Axentes da Garda Civil instruíron dilixencias xudiciais por un delito contra a seguridade viaria a un condutor dun camión articulado, un veciño de Pontevedra de 53 anos de idade, que case sextuplicaba a taxa máxima de alcoholemia permitida para conducores profesionais.

Segundo informou o Instituto Armado, os feitos ocorreron sobre as 1,00 horas da madrugada, cando unha patrulla realizaba un control de vehículos pesados na estrada PO-010, á altura do termo municipal de Vigo.

Ao darlle o alto ao condutor dun camión articulado, os axentes decatáronse de que o home “presentaba evidentes síntomas de inxerir bebidas alcohólicas“, polo que lle realizaron a proba. Así, arroxou un resultado positivo de 0,87 mg/l en aire expirado, o que supera en case seis veces a taxa máxima permitida para condutores profesionais.

Por iso, instruíronse dilixencias contra o home por un delito contra a seguridade viaria. Ademais, o vehículo, que transportaba pezas para a factoría viguesa de PSA, foi inmobilizado ata que outra persoa púidose facer cargo do camión.

O condutor, que conta con antecedentes policiais por conducir baixo a influencia de bebidas alcohólicas, podería enfrontarse a penas de prisión de entre tres e seis meses, a unha multa ou a traballos en beneficio da comunidade; así como á prohibición de conducir vehículos a motor por un período de entre 1 e 4 anos.