A Sección Segunda da Audiencia Provincial de Pontevedra iniciou este martes o xuízo contra un home para o que a Fiscalía pide penas que suman 21 anos de prisión por, supostamente, agredir sexualmente a unha muller septuaxenaria na súa vivenda de Bueu, á que tamén golpearía e roubaría.

Ao comezo do xuízo o acusado negou os feitos que se lle imputan, aínda que a súa declaración terá que esperar ata a última sesión da vista oral.

O xuízo por estes feitos retomouse este martes despois de que fose suspendido o pasado 12 de xaneiro porque o avogado defensor presentaba síntomas compatibles co coronavirus.

Nesta ocasión o letrado expuxo unha serie de cuestións previas, a máis rechamante foi unha petición para que o acusado declarase en último lugar tras a práctica da proba. O avogado da defensa argumentou que é unha circunstancia que “proximamente estará vixente co novo Código Procesual Penal”.

En leste mesmo sentido respondeulle a fiscal, lembrando á sala que este home está a ser xulgado “seguindo os trámites legalmente previstos a día de hoxe”. O tribunal aceptou a petición do avogado e o seu cliente será o último en declarar no plenario.

“VULNERACIÓN DEREITO Á INTIMIDADE”

A defensa tamén alegou a “vulneración do dereito á intimidade” do seu cliente, ao entender que durante a investigación obtívose o seu perfil xenético “con engano” por parte da Garda Civil, polo que a práctica desta proba foi, dixo, “fraudulenta”.

A fiscal replicou que non vai utilizar esa proba durante o xuízo, polo que non pon reparos á queixa do letrado. “Non nos interesa esa proba“, dixo. O Ministerio Público conta con outra recollida de mostras biolóxicas que se obtivo coa autorización expresa do acusado e estando asistido nese momento polo seu avogado. “Todo se practicou legalmente, respectando e garantindo a súa intimidade“, subliñou a fiscal.

Ademais o avogado protestou porque a vítima, unha muller de preto de 80 anos, comparecese por videoconferencia e asistida por un psicólogo. Considera o letrado que esa debe ser unha “situación excepcional” e esixiu “un proceso con todas as garantías e en igualdade de armas“, xa que “entendemos que non está motivada” esa declaración por vía telemática.

O tribunal desestimou esta petición. Con todo, por problemas técnicos que imposibilitaron a conexión, a muller tivo que acudir persoalmente ata a Audiencia onde compareceu a porta pechada, momento no que o tribunal ordenou o desaloxo do público da sala.

ACUSACIÓN

Segundo o escrito de acusación pública, os feitos polos que se xulga a este home ocorreron na madrugada do 3 ao 4 de marzo de 2017, cando o acusado, vestido con roupa escura e coa cabeza cuberta por un pasamontañas, entrou nunha vivenda en Bueu tras romper os cristais e os barrotes dunha porta.

Na vivenda atopábase a vítima soa, que foi sorprendida polo asaltante e non puido defenderse, segundo sostén a Fiscalía. Así, relata no seu escrito que se abalanzou sobre a muller (de 75 anos de idade), á que golpeou e desposuíuna do pixama, antes de porlle cinta illante na boca, taparlle a cabeza con roupa e atarlle as mans por detrás e os xeonllos.

Tras agredila sexualmente, botoulle por encima o contido dunha botella de viño e, cun anaco de saba, tratou de eliminar restos biolóxicos. A continuación, rouboulle 1.250 euros que a muller tiña nun bolso, tiroulle o teléfono móbil a un cubo de lixo na cociña e, despois de soltarlle a corda dos xeonllos, fuxiu da vivenda.

Como consecuencia do ataque, a septuaxenaria sufriu lesións físicas e secuelas. Por estes feitos, o ministerio público considera ao acusado autor dun delito de agresión sexual con penetración, outro de lesións e un de roubo con violencia, e considera que concorren as circunstancias agravantes de aleivosía e disfrace.

Pola agresión sexual pide que sexa condenado a 15 anos de cárcere; polo roubo a catro anos; e polas lesións, a dous anos de prisión. Tamén reclama que indemnice á vítima con 8.460 euros polas lesións e as secuelas, que lle devolva os 1.250 euros que lle roubou e que pague os 90 euros do arranxo dos cristais fracturados na casa (o resto de danos foron cubertos polo seguro).