Un incendio rexistrado na noite deste xoves queimou por completo unha vivenda desocupada no concello pontevedrés de Redondela. Segundo informou o 112 Galicia, sobre as 21,00 horas deste xoves o servizo de emerxencias foi alertado por un particular, desde a Rúa da Prata, sobre unha casa abandonada da que se vía saír fume.
Nese momento, o Centro Integrado de Atención ás Emerxencias de Galicia informou os Bombeiros do Porriño, á Policía Local de Redondela e aos membros de Protección Civil do municipio. No lugar dos feitos, os bombeiros volveron contactar co 112 Galicia para solicitar apoio de máis medios de extinción debido á expansión das chamas na edificación. Por isto, foron alertados tamén o Servizo Municipal de Emerxencias de Mos e os Bombeiros de Vigo.
Finalmente, a Policía Local confirmou que a vivenda, de dúas alturas, ardeu na súa totalidade e que chegou a caer a cuberta. Con todo, non houbo feridos.
