Axentes da Policía Local de Vigo detiveron por un delito de violencia de xénero a un vigués de 37 anos que supostamente golpeou e tirou dos pelos á súa parella en plena rúa.

Segundo informou a Policía Local de Vigo, os feitos ocorreron sobre as 12,30 horas deste mércores, cando un particular informou de que vira como un individuo sacaba pola forza a unha moza dun turismo para despois golpeala e tirarlle dos pelos.

Unha patrulla desprazouse ata o lugar, na avenida Florida, onde localizaron á vítima, unha muller de 23 anos de idade. A moza recoñeceu discutir coa súa parella, pero restoulle importancia e negou ser agredida.

A continuación, os axentes falaron co agresor, quen admitiu que mantivo unha discusión coa súa parella pero tamén negou a agresión. O home indicou, ademais, que foi detido noutra ocasión polos mesmos motivos, aínda que a muller retirara a denuncia.

Ante todas estas circunstancias, os axentes procederon á detención do home, de iniciais I.G.D., pola suposta comisión dun delito de violencia de xénero.