Os servizos sanitarios do 061 evacuaron na noite deste domingo a dúas persoas con síntomas de intoxicación por monóxido de carbono en Ponteareas. Segundo informa o 112 Galicia, os feitos ocorreron pasadas as 21,00 horas nun domicilio situado no lugar de Costa Sequeiros. Ata alí acudiu Urxencias Sanitarias-061 para comprobar o estado no que se atopaban os ocupantes da vivenda, xa que presentaban síntomas como vómitos e mareos, compatibles cunha intoxicación.
Coa finalidade de determinar as causas e a orixe da acumulación de monóxido de carbono, o 112 solicitou a intervención dos membros do GES-Bombeiros de Ponteareas, que confirmaron que a fuga viña dunha estufa de butano despois de realizar as correspondentes medicións. Neste operativo tamén se contou coa colaboración de dous axentes da Policía Local e a Garda Civil.
