A Policía Local de Vigo tramitou  expediente de sanción contra unha parella da cidade, propietarios dun local de hostalaría na rúa Barcelona, por incumprir as restricións de horario e ter varios clientes ocultos no baño do establecemento.

Segundo informaron fontes policiais, os feitos ocorreron a última hora da tarde do sábado, cando unha chamada anónima alertou ao 092 de que había un local na rúa Barcelona con clientes no interior, a pesar de que a norma establece como horario de peche as 17,00 horas.

Unha vez no lugar, os axentes entrevistáronse coa muller propietaria, quen asegurou que non había clientes no establecemento, e que só estaba a súa filla, que lle estaba axudando a limpar. A filla corroborou a versión da nai, asegurando que só estaban elas dúas no local.

Con todo, os policías escoitaron ruído ao fondo do bar, e dirixíronse cara alí, sorprendendo no baño a un home escondido, cunha copa de whisky na man e sen máscara; no servizo de señoras ocultábanse tres mulleres, cada unha coa súa consumición e todas sen máscara. Todos eles foron propostos para sanción.

Ao inspeccionar a cociña, os axentes atopáronse co copropietario do local, parella da dona e, no interior do establecemento, descubriron un almacén cunhas escaleiras que dan a un patio traseiro, por onde “probablemente sairía máis xente”.

FESTA DE MADRUGADA

Por outra banda, a Policía Local de Vigo tamén interveu, na madrugada do sábado, nun local onde se estaba celebrando unha festa. Tras unha chamada anónima, os axentes desprazáronse a un establecemento na estrada do Monte Alba.

Unha vez alí, comprobaron que había nove persoas, todas elas sen máscara e non conviventes, polo que foron propostas para sanción.