A Fiscalía pide 11 anos de prisión para un home acusado de abusar sexualmente da súa filla de 5 anos de idade no partido xudicial de Vigo, e que será xulgado o martes e mércores na sección quinta da Audiencia Provincial de Pontevedra, con sede na cidade olívica.
Segundo o escrito de acusación, os feitos remóntanse a 2017, nunha data non determinada de xuño, cando o procesado, “con ánimo de obter unha satisfacción sexual”, introduciu o seu dedo pulgar na vaxina da súa filla, causándolle un eritema na cara interior do beizo xenital dereito.
Por estes feitos, a Fiscalía atribúelle un delito de abuso sexual agravado sobre menor de 5 anos, con prevalimento de parentesco, e pide que sexa condenado a 11 anos de cárcere, e ao pago dunha indemnización de 60.000 euros á nena.
Así mesmo, reclama que se lle impoña a prohibición de achegarse ou comunicarse coa menor por un período de 10 anos tras saír de prisión, que se lle impoñan 10 anos de liberdade vixiada, e que se lle retire a patria potestade sobre a nena, ademais dunha pena de inhabilitación para exercer dereitos de patria potestade, tutela, garda ou acollemento por un período de 6 anos.
