O xulgado de instrución número 6 de Vigo decretou o ingreso en prisión dunha parella, ambos de nacionalidade colombiana, de 31 e 37 anos de idade, e que foron detidos pola Policía Nacional por delitos relacionados coa prostitución e o tráfico de drogas, e por infracción da Lei de Estranxeiría.

A investigación iniciouse cando a Policía soubo que unha muller estranxeira, en situación de vulnerabilidade, fora obrigada a prostituírse polos donos do piso no que vivía. Os seus explotadores ameazárana con deixala, a ela e á súa familia, na rúa, se non se encartaba ás súas esixencias.

A muller estaba obrigada a estar dispoñible 24 horas, a entregar a metade do diñeiro que lle pagaban, e a consumir drogas e incitar aos clientes a que tamén as consumisen.

A Policía descubriu que esta parella rexentaba un piso de citas e que, mentres que o home se encargaba de ‘promocionar’ ás mozas en webs de contactos e transportalas aos servizos, a muller centrábase nas xestións e cobros.

Ambos foron detidos e trasladados a Comisaría (onde se comprobou que o home tiña varios antecedentes policiais), antes da súa posta a disposición do xulgado, que decretou o ingreso en prisión.