Unha persoa resultou ferida por mor dunha colisión entre dous turismos, un dos cales chegou a envorcar, na estrada que comunica os concellos pontevedreses de Gondomar e Tui.

Segundo informa o 112 Galicia, sobre as 17,00 horas deste martes recibiu a chamada dun particular que informaba dun choque entre dous vehículos, na PO-340, ao paso pola parroquia tudense de Randufe. Pedía asistencia sanitaria para os posibles feridos e atrapados.

De feito, un dos vehículos implicados realizou unha chamada automática a través do sistema ‘eCall’ o que permitiu coñecer aos servizos de emerxencia a localización exacta do sinistro.

O 112 deu o aviso aos bombeiros do Baixo Miño e aos membros do GES da Guarda aínda que, xa no lugar, descartouse o uso do material de excarceración tras comprobar que o único ocupante do vehículo envorcado estaba liberado.

Ademais, solicitouse a intervención de Urxencias Sanitarias de Galicia-061, dos axentes de Tráfico e da Policía Local, e dos voluntarios de Protección Civil da localidade. Finalmente, a persoa ferida foi evacuada con lesións de diversas consideración a un centro hospitalario.

O accidente deixou restos na vía, polo que foi necesaria a participación do persoal de mantemento da Axencia Galega de Infraestruturas para habilitar de novo as condicións de seguridade na calzada.