Axentes da Policía Local de Vigo detiveron a un veciño da cidade, J.P.R., de 50 anos de idade, como presunto autor dun delito de violencia de xénero tras agredir á súa parella na vía pública e nunha cafetaría.
Segundo informaron fontes policiais, os feitos ocorreron na noite do pasado venres, cando o 092 recibiu un aviso dunha testemuña que presenciara na zona de Praza de España como un home golpeaba a unha muller coa man, “con contundencia e en repetidas ocasións”, mentres lle gritaba.
A testemuña seguiu á parella ata unha cafetaría, onde o sospeitoso continuou coa agresión. De feito, un cliente do local volveu chamar á Policía ao ver o ataque e, pouco despois, os axentes presentáronse no establecemento.
Os policías entrevistáronse coa muller, quen negou a agresión e se autoculpó dunha discusión que tivera coa súa parella. O sospeitoso tamén negou os feitos, pero os testemuños de diferentes testemuñas, que coincidiron en narrar a agresión, determinaron a detención do home por un delito de violencia de xénero.
