Un mozo resultou ferido de gravidade ao soltarse dunha corda á que se agarrou para lanzarse ao río en Ponteareas e caer nunha zona de terra firme, informaron o 112 e Protección Civil de Ponteareas.

O mozo atopábase na tarde do venres na contorna do río Tea, ao seu paso por Ribadetea e utilizou unha corda atada a unha árbore para tirarse á auga. No entanto non alcanzou o río e golpeouse co chan. Ao lugar desprazouse o helicóptero con base en Ourense para atender o ferido, que se atopaba inconsciente.

A alerta activouse no 112 cara ás 19,00 horas do venres, tras recibir o aviso de Urxencias Sanitarias-061. O mozo foi trasladado pola aeronave ao Hospital Álvaro Cunqueiro, en Vigo, para ser atendido.

Ademais, desprazáronse ao lugar membros de Protección Civil de Ponteareas e axentes da Policía Local e colaboraron tamén a Garda Civil e profesionais do GES-Bombeiros de Ponteareas.