Axentes da Policía Local de Vigo detiveron a un veciño da cidade, P.F.C., de 40 anos de idade e de nacionalidade boliviana, como presunto autor dun delito de violencia no ámbito familiar e de atentado a axentes da autoridade.

Segundo informaron fontes da Policía Local, os feitos ocorreron a pasada madrugada, cando unha muller chamou ao 092 para alertar de que a súa parella, que se atopaba baixo os efectos do alcol, estaba a ter unha forte discusión co seu fillo de 16 anos.

Unha dotación policial desprazouse ao domicilio, na rúa Escultor Gregorio Fernández, e alí estaban a muller e o seu fillo, que relataron que a parella dela insultouna e ameazouna. O home tamén mantivo unha discusión co menor e a muller, medorenta de que o agredise, avisou á Policía, xa que “é habitual” que o home exerza malos tratos físicos e psicolóxicos cara a ela e cara ao seu fillo.

Os axentes fixeron unha batida pola zona para tratar de localizar ao presunto maltratador e atopárono na confluencia de Escultor Fernández e Vía Norte, ouriñando no medio de dous vehículos estacionados.

Cando lle requiriron para que lles entregase a súa documentación, o home negouse e mostrouse agresivo cara aos axentes. O sospeitoso volveuse cada máis violento e tratou de atacar a un dos funcionarios, polo que tivo que ser reducido para a súa detención.