O Concello de Tui (Pontevedra) celebrou este luns unha homenaxe en recordo do matrimonio falecido na explosión do 23 de maio, Abdelkhalek o Bouabi Hailas e Ezzoura Bouadel, onde un portavoz da comunidade marroquí (á que pertencían estas dúas persoas) sinalou: “O que ocorreu é difícil de esquecer, pero segue a vida adiante”.
O acto celebrouse na tarde deste luns no Parque do Souto de Guillarei, parroquia veciña á de Paramos, na que aconteceu a explosión pirotécnica que acabou coa vida destas dúas persoas, e na que resultaron feridos os seus dous fillos e outra trintena de persoas.
Após gardar un minuto de silencio, interveu o alcalde da localidade, Carlos Vázquez Padín, que aínda que lamentou as “terribles perdas materiais” e sumouse ao “sentimento de solidariedade e profunda dor de Tui”, subliñou que “só hai unha cousa que non –se poderá– remediar”, como é “a perda de dúas vidas humanas”.
“Máis aló, quen máis o vai a sentir son os seus dous fillos, que quedaron orfos de pai e nai o mesmo día. É o que máis nos doe aos tudenses e a min como alcalde tamén”, apuntou o rexedor, que lembrou que estes nenos permanecen baixo a custodia da Xunta, e o Concello permanece “pendente e preocupado para que estean o mellor atendidos posible”.
Acto seguido, tamén trasladou aos afectados que acudiron a participar nesta homenaxe que fará “todo o posible por axudar a superar este difícil transo e que Paramos volva recuperar a normalidade canto antes”.
Finalmente, destacou o comportamento “exemplar” da comunidade marroquí que habita en Tui, posto que, “en todo momento, a pesar de vivir unha traxedia que lles afectaba de forma moi directa, mantiveron a calma e comportáronse como cidadáns exemplares”. Así, concluíu a súa intervención pedindo un “aplauso moi especial” para este colectivo.
“SEGUE A VIDA”
Un portavoz desta comunidade agradeceu aos presentes a súa “solidariedade” ante esta traxedia, e a súa asistencia a un acto que, recoñeceu, alivia a súa “dor”. “Grazas, que Deus bendiga a todos”, engadiu.
“Non hai palabras, o que ocorreu é difícil de esquecer, pero grazas á vosa solidariedade e apoio, aliviamos un pouco e esquecemos aos poucos. Segue a vida adiante”, subliñou, engadindo que “non hai ningunha queixa” sobre o Goberno local porque lles “entende” e está en coordinación con eles.
