Un traballador de 56 anos de idade, M.R.D.S., natural do municipio ourensán de Padrenda, faleceu este venres en Vigo tras sufrir unha parada cardiorrespiratoria e precipitarse desde o alto dunha escaleira.
Segundo informaron fontes da Policía Local, o suceso produciuse á primeira hora da mañá deste venres, nunha obra na rúa Real, no Casco Vello da cidade olívica.
O 092 recibiu un aviso dun accidente laboral grave e, ao chegar ao lugar, o responsable da obra relatou aos axentes que un operario se precipitou desde unha escaleira, “coma se lle dese algo”.
Segundo explicou, o home estaba a subir pola escaleira cando, de súpeto, detívose e esborrallouse sen causa aparente. O seu xefe tentou movelo e, ao ver que non respondía, colocouno en posición lateral de seguridade e avisou a emerxencias médicas e á Policía.
Os axentes observaron que o operario estaba tombado no chan, moi amoratado e cun fío de sangue saíndolle pola boca, con signos de atoparse en parada cardiorrespiratoria. Ao comprobar que non respiraba iniciaron as manobras de reanimación básica.
Pouco despois chegou unha ambulancia medicalizada, cuxo persoal continuou coas devanditas manobras, pero non puideron facer nada polo home e o médico só puido certificar o falecemento.
