Unha muller de 69 anos de idade faleceu e dous homes resultaron feridos, un grave e outro leve, como consecuencia dunha colisión frontal entre dous vehículos que circulaban pola Nacional 550 ao seu paso pola localidade pontevedresa de Mos.
Segundo informaron a Europa Press fontes do 112 Galicia, os feitos ocorreron pouco despois das 16:00 horas deste mércores na N-550, concretamente no punto quilométrico 148, na parroquia de Louredo.
A Garda Civil de Pontevedra alertou ao 112 dun accidente múltiple con persoas atrapadas, polo que desde o Centro de Atención ás Emerxencias se avisou a Urxencias Sanitarias de Galicia-061, Bombeiros de Baixo Miño e Vigo, Protección Civil de Mos e Garda Civil de Tráfico.
Após desprazarse ao lugar, no cruzamento dos Valos, os bombeiros comunicaron ao 112 que non foi necesario excarcerar a ninguén e que, como resultado do sinistro, unha persona resultou falecida, outra ferida grave e outra ferida leve.
Pola súa banda, Urxencias Sanitarias de Galicia informou de que, após recibir a alerta na Central de Coordinación, acudiron ao lugar dúas ambulancias asistenciais e unha ambulancia medicalizada, que atenderon a tres persoas.
Así, a pesares dos esforzos do equipo sanitario, non se puido salvar a vida dunha muller de 69 anos e iniciais M.L.M. Pola súa banda, foi trasladado ao Hospital Álvaro Cunqueiro un home de 71 anos e siglas M.F.G., e ao Hospital de Fátima un home de 48 anos e iniciais F.M.G.
