Axentes de Policía Nacional da Comisaría de Vigo detiveron a un veciño da cidade, de 24 anos de idade, como presunto autor dun delito contra a saúde pública por venda de droga.
Segundo informaron fontes policiais, a investigación iniciouse ao terse coñecemento da posible existencia dun ‘punto negro’ de venda de estupefacientes na contorna de Sanjurjo Badía, no barrio de Teis.
A Policía despregou un dispositivo de vixilancia e identificou a un mozo que se citaba cos supostos compradores en diversos puntos, tomando precaucións para eludir a acción policial, e marchándose tras realizar rápidos intercambios.
Os axentes localizaron ao sospeitoso a pasada madrugada, cando se dispuña a realizar unha venda. Nese momento foi interceptado e, ao realizarlle un cacheo, atoparon unha “importante cantidade de haxix”, así como diñeiro en efectivo. O home foi detido e trasladado a Comisaría e, tras a realización de dilixencias, foi posto a disposición do xulgado de instrución de Vigo en funcións de garda.