Unha colisión entre vehículos na estrada de Tui ocorrida na tarde deste sábado saldouse con tres persoas feridas. O sinistro tivo lugar á primeira hora da tarde na vía que une o municipio con Caldelas.

Segundo informa o 112, dúas das vítimas do accidente quedaron atrapadas no interior dos coches implicados e tiveron que ser excarceradas polos servizos de emerxencia.

En concreto, foi un particular quen, sobre as 13,25 horas da tarde, alertaba á central do 112 do ocorrido. Seguidamente, este servizo puxo a situación en coñecemento de Urxencias Sanitarias-061, da Garda Civil de Tráfico, dos bombeiros do Baixo Miño, de Protección Civil e da Policía Local.